شاعره سينا الاولى ايمان مواز

[center]أنت حُر
*********
أنت حُرّ
كلمة زى الشهد ..
بلسم القلوب
لما تسمعها .. تدوب
لما تحياها .. يدوب ..
تحِّس انك م البشر
مش أى تمثال ..
أو حجر
ياما غنِّت الربابة ..
بالحكاوى
ع القهاوى .. تقول تاريخنا
يُصرخ القائد فى جيشنا
ويناديلنا ..
بالحقوق الضايعة ِمنّا
***
قال عرابى للخديوى :
إحنا أحرار غصب عنكم
أحرار خلقنا ربنا
حقنا .. وهناخده منكم

وعاشت الحرية فينا
زى روحنا ونور عينينا
ضحينا .. بالغالى النفيس ..
من ولادنا
لجل تتحرر بلادنا ..
من نجاسة الغريب
***
العجيب
ازاى وامتى الوقت فات
واللي عاش جوانا .. مات
واما تانى سمعتها
أنت حرّ
حسيت حلاوة طعمها
فى الحلق مرّ
وسمعت من تحت الثرى
ضحكة شهيد
ساخر بيسأل .. من بعيد
أنت حر ؟؟ بأمارة إيه ؟؟
أنت حرّ ؟؟
ازاى وامتى .. وفين وليه ؟؟
الفعلا حُرّ فيه ..
شاور لى بصباعك عليه
***
من ميلادك وأنت حر
بس تاخد إذن أبوك
وأما تنزل ..
تمشى ماسك أيد أخوك
فى المدارس .. علموك
قيمة الحرية .. لكن
بالعصاية .. وجهوك
فى الوظيفة
تبقى حر .. يحذروك
وان عاندت .. يرفدوك
حتى فى علاقتك بربك
تحت عينهم .. يرصدوك
أما طبعا فى السياسة
أنت حر ابن حر
بس حاسب .. يمسكوك
***
مش بقولك .. إنت حرّ
من ميلادك للممات
بس عيشها جوه نفسك
من سُكات
أما ناوى تكون زعيم
يبقى وقت النُصح فات
***
امتى تفهم يا غشيم ؟؟
الحكاية زى لعبة
كرّ .. فرّ
والنهاية هي طبعا
أنت حُرّ
***